ភ្នំពេញ៖ នាព្រឹកថ្ងៃទី២៤ ខែតុលា ឆ្នាំ២០២៦ លោក បណ្ឌិតម៉េង សុភ័ណ្ឌ ប្រធានសមាគមអ្នកសារព័ត៌មានអេឡិចត្រូនិច (MSJ) សហការជាមួយ លោក ផាត់ ចំណាន ប្រធានសមាគមអ្នកសារព័ត៌មានមាគ៌ាសន្តិភាព បានរៀបចំបើកវគ្គសិក្ខាសាលា «ស្តីពី ការទទួលខុសត្រូវរបស់អ្នកសារព័ត៌មានក្នុងសម័យឌីជីថល» ដែលមានសិក្ខាកាម ប្រមាន ៦៤០នាក់
ក្នុងវគ្គសិក្ខាសាលានេះមានរយៈពេលពីរថ្ងៃ គឺថ្ងៃទី២៤ និងថ្ងៃទី២៥ ខែតុលា ឆ្នាំ២០២៦ ដែលបានរៀបចំឡើង នៅសាលចតុមុខមង្គល និងសាលមណ្ឌលបណ្តុះបណ្តាល និងវិក្រឹតការវិជ្ជាជីវៈសារព័ត៌មាន ទីស្តីការក្រសួងព័ត៌មាន ក្រោមអធិបតីភាព ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងកាបើកសិក្ខាសាលាស្តីពី «ការលើកកម្ពស់ការទទួលខុសត្រូវវិជ្ជាជីវៈសារព័ត៌មាន ការគោរពក្រមសីលធម៌ និងការអនុវត្តច្បាប់ក្នុងយុគសម័យឌីជីថល» ។
នៅក្នុងសិក្ខាសាលានេះផងដែ ដោយមានការអញ្ជើញចូលរួមពីថ្នាក់ដឹកនាំក្រសួងព័ត៌មាន តំណាងសមាគមអ្នកសារព័ត៌មាន អ្នកគ្រប់គ្រងស្ថាប័នសារព័ត៌មាន និពន្ធនាយក អ្នកសារព័ត៌មាន និងអ្នកផលិតមាតិកាឌីជីថលសរុបជាប្រមាណ៦៤០នាក់ ។
ការរៀបចំសិក្ខាសាលានេះមានគោលបំណងលើកកម្ពស់ការយល់ដឹងអំពីការទទួលខុសត្រូវក្នុងវិជ្ជាជីវៈសារព័ត៌មាន ការប្រកាន់ខ្ជាប់នូវក្រមសីលធម៌វិជ្ជាជីវៈ និងការអនុវត្តច្បាប់ឱ្យបានត្រឹមត្រូវ ស្របតាមការវិវត្តនៃបច្ចេកវិទ្យាឌីជីថល។
ជាពិសេស សិក្ខាសាលានេះជាវេទិកាសម្រាប់ការផ្លាស់ប្តូរចំណេះដឹង បទពិសោធន៍ និងការពិភាក្សាអំពីបញ្ហាប្រឈមនានាក្នុងវិស័យសារព័ត៌មាន ដើម្បីចូលរួមជំរុញការផ្សព្វផ្សាយព័ត៌មានប្រកបដោយវិជ្ជាជីវៈ ភាពត្រឹមត្រូវ តម្លាភាព និងការទទួលខុសត្រូវចំពោះសង្គម។
ក្នុងបរិបទដែលបច្ចេកវិទ្យាឌីជីថល និងបណ្តាញសង្គមកំពុងមានការរីកចម្រើនយ៉ាងឆាប់រហ័ស ការគោរពក្រមសីលធម៌ ការផ្ទៀងផ្ទាត់ព័ត៌មានមុនពេលផ្សព្វផ្សាយ និងការយល់ដឹងអំពីច្បាប់ គឺជាកត្តាសំខាន់ក្នុងការពង្រឹងទំនុកចិត្តរបស់សាធារណជនចំពោះស្ថាប័នសារព័ត៌មាន និងអ្នកសារព័ត៌មាន។
សិក្ខាសាលានេះក៏ជាឱកាសមួយសម្រាប់អ្នកពាក់ព័ន្ធក្នុងវិស័យសារព័ត៌មានរួមគ្នាពង្រឹងសមត្ថភាព និងជំរុញការអនុវត្តវិជ្ជាជីវៈឱ្យកាន់តែមានប្រសិទ្ធភាព ក្នុងគោលដៅរួមចំណែកដល់ការផ្សព្វផ្សាយព័ត៌មានពិត និងការអភិវឌ្ឍសង្គមក្នុងយុគសម័យឌីជីថល៕
