ស្វែងយល់អំពីច្បាប់ចរាចរណ៍
រូបភាពកុមារតូចៗឈរកាន់ផ្លាក «ឈប់» កណ្តាលផ្លូវមុខសាលា៖ តើជាទង្វើគួរឱ្យសរសើរ ឬជាការប្រព្រឹត្តល្មើសច្បាប់ និងយកជីវិតកុមារទៅប្រថុយ?
ការអនុញ្ញាត ឬការចាត់តាំងឱ្យកុមារតូចៗ (អាយុ ៥–៦ ឆ្នាំ ឬសិស្សថ្នាក់បឋមសិក្សា) ទៅឈរកាន់ផ្លាកសញ្ញា «ឈប់» នៅកណ្តាលទ្រូងផ្លូវសាធារណៈ ដើម្បីបញ្ឈប់យានយន្ត និងសម្រួលឱ្យសិស្សដទៃឆ្លងផ្លូវ ប្រឈមនឹងបញ្ហាផ្លូវច្បាប់ និងហានិភ័យធ្ងន់ធ្ងរជាច្រើន យោងតាមច្បាប់ស្តីពីចរាចរណ៍ផ្លូវគោក ដូចខាងក្រោម៖
(១). ការរំលោភលើបទប្បញ្ញត្តិស្តីពីសុវត្ថិភាពកុមារលើផ្លូវសាធារណៈ
- មាត្រា ៣១ ចំណុច ៦ នៃច្បាប់ស្តីពីចរាចរណ៍ផ្លូវគោក បានចែងយ៉ាងច្បាស់ថា «ហាមកុមារអាយុតិចជាង ៦ (ប្រាំមួយ) ឆ្នាំ ដើររហេតរហូតលើផ្លូវថ្នល់»។
- ការឱ្យកុមារអាយុ ៥–៦ ឆ្នាំ ទៅឈរ ឬដើរនៅលើទ្រូងផ្លូវសាធារណៈ គឺជាអំពើផ្ទុយពីច្បាប់ចរាចរណ៍ ព្រោះកុមារក្នុងវ័យនេះមិនទាន់មានកាយសម្បទា ការយល់ដឹង ឬសមត្ថភាពប្រុងប្រយ័ត្នគ្រប់គ្រាន់ក្នុងការគេចវេះពីគ្រោះថ្នាក់ឡើយ។
(២). គ្មានសិទ្ធិអំណាចតាមផ្លូវច្បាប់ក្នុងការបញ្ជា ឬសម្រួលចរាចរណ៍
- មាត្រា ៦ ចំណុច ៣ និង មាត្រា ៦០ បានកំណត់ថា មានតែ «ភ្នាក់ងារចរាចរណ៍» ឬមន្ត្រីដែលមានសមត្ថកិច្ចផ្លូវការប៉ុណ្ណោះ ទើបមានសិទ្ធិអំណាច និងភារកិច្ចក្នុងការបញ្ជា រៀបចំ និងសម្រួលចរាចរណ៍នៅលើផ្លូវសាធារណៈ។
- សិស្សសាលា ឬកុមារ មិនមែនជាភ្នាក់ងារចរាចរណ៍ឡើយ ដូច្នេះការកាន់ផ្លាក «ឈប់» ដោយកុមារ គ្មានប្រសិទ្ធភាពផ្លូវច្បាប់ក្នុងការបង្ខំឱ្យអ្នកបើកបរស្ដាប់តាម ឬឈប់ឡើយ។ ប្រសិនបើអ្នកបើកបរមិនឈប់ ក៏មិនអាចចោទប្រកាន់អ្នកបើកបរថា «មិនគោរពសញ្ញារបស់ភ្នាក់ងារចរាចរណ៍» បានដែរ។
(៣). បញ្ហាប្រឈមនៃការរារាំងចរាចរណ៍សាធារណៈ
- មាត្រា ៨០ បានចែងថា ជនណាដែល រារាំង ឬប្រើប្រាស់មធ្យោបាយណាមួយ ដើម្បីជាឧបសគ្គដល់ចរាចរណ៍សាធារណៈ ត្រូវផ្ដន្ទាទោសដាក់ពន្ធនាគារពី ១ (មួយ) ខែ ទៅ ១ (មួយ) ឆ្នាំ និងពិន័យជាប្រាក់ពី ៨០០.០០០ (ប្រាំបីសែន) រៀល ទៅ ៨.០០០.០០០ (ប្រាំបីលាន) រៀល។
- ការឱ្យបុគ្គលដែលគ្មានសមត្ថកិច្ច ឬកុមារទៅឈរស្កាត់ ឬបាំងផ្លូវ អាចត្រូវបានពិចារណាថាជាការបង្កឧបសគ្គ ឬរារាំងដល់លំហូរចរាចរណ៍សាធារណៈដោយខុសច្បាប់។
(៤). ការទទួលខុសត្រូវផ្នែកព្រហ្មទណ្ឌ និងរដ្ឋប្បវេណីរបស់អាណាព្យាបាល/សាលារៀន
- យោងតាម មាត្រា ៧២ នៃការទទួលខុសត្រូវផ្នែកព្រហ្មទណ្ឌ និងរដ្ឋប្បវេណី ប្រសិនបើមានគ្រោះថ្នាក់ចរាចរណ៍កើតឡើង (ឧទាហរណ៍៖ យានយន្តជ្រុលទៅបុកកុមារនោះ) អាណាព្យាបាល គ្រូបង្រៀន ឬគណៈគ្រប់គ្រងសាលាដែលជាអ្នកចាត់តាំង ឬបណ្តែតបណ្តោយឱ្យកុមារទៅឈរលើផ្លូវ អាចត្រូវប្រឈមមុខនឹងការចោទប្រកាន់ពី បទធ្វេសប្រហែស ឬខ្វះការប្រុងប្រយ័ត្ន ដែលបណ្តាលឱ្យកុមាររងរបួស ឬបាត់បង់ជីវិត។
ជាដំណោះស្រាយ និងវិធានការត្រឹមត្រូវតាមច្បាប់៖
- កាតព្វកិច្ចរបស់អ្នកបើកបរ (មាត្រា ១៧ ចំណុច ១២ និង មាត្រា ២៦)៖ អ្នកបើកបរគ្រប់រូប ត្រូវតែ “បន្ថយល្បឿននៅជិតសាលារៀន” (ក្នុងចម្ងាយ ៥០ ម៉ែត្រពីសាលា) និងត្រូវ “ឈប់ ឬផ្តល់សិទ្ធិអាទិភាពឱ្យសិស្សឆ្លងផ្លូវ” នៅត្រង់កន្លែងដែលមានរំនូសសញ្ញាសម្រាប់ថ្មើរជើងឆ្លងកាត់។
- អ្នកសម្រួលចរាចរណ៍៖ ការសម្រួលចរាចរណ៍នៅមុខសាលារៀន ត្រូវតែធ្វើឡើងដោយកម្លាំងនគរបាលចរាចរណ៍ ដើម្បីជួយសម្រួលការឆ្លងផ្លូវរបស់សិស្សជារៀងរាល់ថ្ងៃ ដោយដាច់ខាតមិនត្រូវឱ្យកុមារតូចៗទៅឈរកណ្តាលទ្រូងផ្លូវឡើយ។
