[ភ្នំពេញ]៖ អគ្គនាយកដ្ឋានគយនិងរដ្ឋាករកម្ពុជា នៅថ្ងៃទី ១៩ ខែមិថុនាឆ្នាំ ២០២៦បានចេញសេចក្តីជូនដំណឹងក្រើនរំលឹកជាថ្មីដល់ អាជីវករ ពាណិជ្ជករ ធុរជន និងសាធារណជនទាំងអស់ អំពីការបន្តរឹតបន្តឹង និងហាមឃាត់ការនាំចូលមុខទំនិញយុទ្ធសាស្ត្រមួយចំនួនដែលមានប្រភពដើមពីប្រទេសថៃ។
ខាងក្រោមនេះជាព័ត៌មានលម្អិតដែលបងប្អូនប្រជាពលរដ្ឋ និងអាជីវករត្រូវជ្រាប៖
១. មុខទំនិញជាប់បម្រាមដាច់ខាត (ហាមនាំចូល)
វិធានការហាមឃាត់នេះ ត្រូវបានអនុវត្តយ៉ាងម៉ឺងម៉ាត់លើមុខទំនិញពីរប្រភេទធំៗ រួមមាន៖
. ផ្នែកកសិផល៖ បន្លែ និងផ្លែឈើគ្រប់ប្រភេទ។
. ផ្នែកថាមពល (ប្រេងនិងឧស្ម័នឥន្ធនៈ)៖ 1. ប្រេងសាំង (Gasoline)
. ប្រេងម៉ាស៊ូត (Diesel)
. ឧស្ម័នរាវសម្រាប់ដុត (LPG និង LNG)
. ប្រេងខ្មៅ (Fuel oil)
. ប្រេងសាំងយន្តហោះ (Jet-A1)
. មុខទំនិញអនុញ្ញាតឱ្យនាំចូលធម្មតា
ក្រៅពីមុខទំនិញហាមឃាត់ខាងលើ (បន្លែ ផ្លែឈើ និងប្រេងឥន្ធនៈ) ទំនិញផ្សេងៗទៀតមិនស្ថិតក្នុងបញ្ជីហាមឃាត់ឡើយ។
អាជីវករអាចធ្វើការនាំចូលបានជាធម្មតា ប៉ុន្តែត្រូវបំពេញបែបបទ និងនីតិវិធីគយឱ្យបានត្រឹមត្រូវស្របតាមច្បាប់ជាធរមាន។
. ការបិទច្រកព្រំដែនគោក និងការប្តូរផ្លូវដឹកជញ្ជូន
ចំណុចសំខាន់៖ មាត់ច្រកព្រំដែនផ្លូវគោកកម្ពុជា-ថៃ ត្រូវបានបិទជាឯកតោភាគីដោយយោធាថៃ។
ដំណោះស្រាយ៖ អាជីវករអាចផ្លាស់ប្តូរមកប្រើប្រាស់មធ្យោបាយដឹកជញ្ជូនផ្សេងទៀត (ដូចជាផ្លូវទឹក ឬផ្លូវអាកាស) និងត្រូវឆ្លងកាត់តាមបណ្តាមាត់ច្រកផ្លូវការនានាជំនួសវិញ។
ការបញ្ជាក់បន្ថែម អគ្គនាយកដ្ឋានគយនិងរដ្ឋាករកម្ពុជា នឹងបន្តតាមដានស្ថានការណ៍នេះយ៉ាងយកចិត្តទុកដាក់ និងធ្វើបច្ចុប្បន្នភាពព័ត៌មានជាបន្តបន្ទាប់ជូនដល់ធុរជន និងសាធារណជនក្នុងករណីមានការប្រែប្រួល។
សូមអាជីវករ និងពាណិជ្ជករទាំងអស់ ចូលរួមអនុវត្តតាមសេចក្តីជូនដំណឹងនេះ ប្រកបដោយស្មារតីទទួលខុសត្រូវខ្ពស់។
