បរទេស: ប្រធានាធិបតីអាមេរិកលោក ដូណាល់ ត្រាំ បាននិយាយថា លោករំពឹងថានឹងថ្លែង នៅថ្ងៃព្រហស្បតិ៍ ជាមួយមេដឹកនាំថៃ និងកម្ពុជា ដើម្បីទាមទារឱ្យបញ្ឈប់ ការប៉ះទង្គិចគ្នាឡើងវិញ របស់ប្រទេសទាំងពីរ។
យោងតាមសារព័ត៌មាន CNA ចេញផ្សាយនៅថ្ងៃទី១១ ខែធ្នូ ឆ្នាំ២០២៥ ថា លោក ត្រាំ បានប្រាប់អ្នកយកព័ត៌មាន នៅសេតវិមាន កាលពីថ្ងៃពុធថា “ខ្ញុំគិតថាខ្ញុំត្រូវបានកំណត់ ពេលនិយាយជាមួយពួកគេ នៅថ្ងៃស្អែក”។
ថ្លែងទៅកាន់អ្នកយកព័ត៌មាន នៅថ្ងៃព្រហស្បតិ៍ នាយករដ្ឋមន្ត្រីថៃ លោក Anutin Charnvirakul បាននិយាយថា មិនទាន់មានការសម្របសម្រួល ណាមួយជាមួយលោក ត្រាំ នៅឡើយទេ។
លោក Anutin បាននិយាយថា “ប៉ុន្តែប្រសិនបើមានការហៅទូរស័ព្ទពីប្រធានាធិបតីអាមេរិក យើងពិតជានឹងលើកទូរស័ព្ទ ហើយយើងនឹងពន្យល់គាត់ … គាត់មិនមានព័ត៌មានលម្អិតអំពីស្ថានភាពជាងខ្ញុំទេ”។
លោកនាយករដ្ឋមន្ត្រីថៃរូបនេះបានបន្ថែមថា “នេះជាបញ្ហារវាងប្រទេសទាំងពីរ។ គាត់មានចេតនាល្អក្នុងការឃើញសន្តិភាព ប៉ុន្តែយើងត្រូវពន្យល់ពីបញ្ហា និងមូលហេតុដែលវាប្រែជាបែបនេះ”៕
