កណ្តាល ÷យុវជនម្នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុ ខណៈស្ត្រីម្នាក់ទៀតរងរបួសធ្ងន់ ដោយគ្រោះថ្នាក់ចរាចរណ៏ រវាងម៉ូតូបុកជាមួយម៉ូតូ នៅពេលយប់វេលាម៉ោង ១៩និង៣០នាទីថ្ងៃទី ២៧ ខែធ្នូ ឆ្នាំ២០២៥ នៅលើកំណាត់ផ្លូវជាតិលេខ ១២១០ស្ថិតក្នុងភូមិតានូ ឃុំស្អាងភ្នំ ស្រុកស្អាង ខេត្តកណ្តាល។
ប្រភពពីសមត្ថកិច្ច បានប្រាប់អោយដឹងថា÷ មុនពេលកើតហេតុ មានម៉ូតូមួយគ្រឿង ម៉ាក HONDA Dream C125 ពណ៍ខ្មៅ ពាក់ស្លាកលេខ ភ្នំពេញ 1H-3542 បើកបរដោយឈ្មោះ ទី នីតា ភេទប្រុស អាយុ២១ឆ្នាំជនជាតិខ្មែរ មុខរបរ បច្ចេកទេសMEXER តន្ត្រីសម័យ (ស្លាប់ភ្លាមៗនៅកន្លែងកើតហេតុ ) ដែលមានទីលំនៅភូមិព្រែកស្លែង ឃុំស្អាងភ្នំ ស្រុកស្អាង ខេត្តកណ្ដាល ក្នុងទិសដៅពីត្បូងទៅជើង(មិនពាក់មួកសុវត្ថិភាព) ពេលបើកបរមកដល់ចំណុចកើតហេតុក៏បានវ៉ាជែងរថយន្តមួយគ្រឿង ដែលនៅខាងមុខ ហើយក៏បានជ្រុលទៅបុកជាមួយម៉ូតូមួយគ្រឿងម៉ាក់Honda Dream C125 ពណ៌ខ្មៅពាក់ស្លាកលេខកំពង់ចាម1C-1381បើកបរដោយ ឈ្មោះ រិន ម៉េងហៀង ភេទស្រីអាយុ៣៤ឆ្នាំជនជាតិខ្មែរ (រងរបួសធ្ងន់) ត្រូវបានសាច់ញ្ញាតិបញ្ជូនទៅព្យាបាលនៅមន្ទីរពេទ្យរាជធានីភ្នំពេញ និងមានមុខរបរជាកម្មការិនីរោងចក្រ (ពាក់មួកសុវត្ថិភាព) មានទីលំនៅ ភូមិតាពេជ្រ ឃុំក្រាំងយ៉ូវ ស្រុកស្អាង ខេត្តកណ្ដាល ដែលបើកបរក្នុងទិសដៅពីជើងទៅត្បូង បញ្ច្រាសទិសគ្នា ។
ក្រោយពេលកើតហេតុសមត្ថកិច្ចជំនាញបានចុះទៅពិនិត្យ វាស់វែង និងបានយកមធ្យោបាយធ្វើដំណើរ រងការខូចខាតធ្ងន់ទាំង០២គ្រឿង មករក្សាទុកជាបណ្តោះអាសន្ន នៅអធិការដ្ឋាននគរបាលស្រុកស្អាង ដើម្បីកសាងសំណុំរឿងទៅតាមនីតិវិធីច្បាប់។
សព ជនរងគ្រោះបានប្រគល់ជូនក្រុមគ្រួសារមកទទួលយកទៅធ្វើបុណ្យតាមប្រពៃណី ៕
(ដោយ÷ ចាន់ថា)
